Frae The Friends And Land I Love

________________________________________________
Title:     Frae The Friends And Land I Love
Author: Robert Burns [More Titles by Burns]

Tune--"Carron Side."

Frae the friends and land I love,
Driv'n by Fortune's felly spite;
Frae my best belov'd I rove,
Never mair to taste delight:
Never mair maun hope to find
Ease frae toil, relief frae care;
When Remembrance wracks the mind,
Pleasures but unveil despair.

Brightest climes shall mirk appear,
Desert ilka blooming shore,
Till the Fates, nae mair severe,
Friendship, love, and peace restore,
Till Revenge, wi' laurel'd head,
Bring our banished hame again;
And ilk loyal, bonie lad
Cross the seas, and win his ain.

[The end]
Robert Burns's poem: Frae The Friends And Land I Love

________________________________________________



GO TO TOP OF SCREEN