Contented Wi' Little And Cantie Wi' Mair

________________________________________________
Title:     Contented Wi' Little And Cantie Wi' Mair
Author: Robert Burns [More Titles by Burns]

[Tune-"Lumps o' Puddin'."]

Contented wi' little, and cantie wi' mair,
Whene'er I forgather wi' Sorrow and Care,
I gie them a skelp as they're creeping alang,
Wi' a cog o' gude swats and an auld Scottish sang.
Chorus-Contented wi' little, &c.

I whiles claw the elbow o' troublesome thought;
But Man is a soger, and Life is a faught;
My mirth and gude humour are coin in my pouch,
And my Freedom's my Lairdship nae monarch dare touch.
Contented wi' little, &c.

A townmond o' trouble, should that be may fa',
A night o' gude fellowship sowthers it a':
When at the blythe end o' our journey at last,
Wha the deil ever thinks o' the road he has past?
Contented wi' little, &c.

Blind Chance, let her snapper and stoyte on her way;
Be't to me, be't frae me, e'en let the jade gae:
Come Ease, or come Travail, come Pleasure or Pain,
My warst word is: "Welcome, and welcome again!"
Contented wi' little, &c.

-THE END-
Robert Burns' poem: Contented Wi' Little And Cantie Wi' Mair

________________________________________________



GO TO TOP OF SCREEN